Tawagar da mataimakin shugaban Najeriya Yemi Osinbajo ya jagoranta, itace ta bayyana haka bayan ta gana da ‘yan kasuwa da masana fasaha a Silicon Valley, dake jahar California.

Tawagar jami’an Najeriya karkashin jagorancin mataimakin shugaban Najeriya Farfessa Yemi Osinbanjo, ta kammala wata ziyarar kwadaitawa ‘yan kasuwar Amurka musamman masu masana’antun fasaha su tafi Najeriya su zuba jari.

Shugaban hukumar bunkasa fasahar zamani ta Najeriya Dr.Isa Ali Pantami, yace akwai kudi dala milyan dubu daya da Amurkan ta ware domin zuba jari ta fannin fasaha. Saboda haka ne suka kawo ziyara suka gana da ‘yan kasuwa da masu manyan kamfanonin fasaha, suka gwada musu fa’aidar zuba jarin a Najeriya fiyeda wasu wurare.

Dr. Pantami, ya gayawa wakilin Sashen Hausa Nasiru Adamu El-Hikaya cewa, akalla ‘yan kasuwa da masu kamfanonin fasaha da ba zasu kasa 30 bane suka halarci ganawar.

Pantami, yace, sunyi amfani da damar suka kuma ziyarci manya manyan kamfanonin fasaha kamar su Google, da takwarorinsa a fannin fasaha wadanda walau za su je Najeriya su zuba jari, ko kuma za su je kasar domin horasda matasa da akalla za su kai dubu ashirin.

VOAHAUSA.COM

LEAVE A REPLY